政情：葉劉任亮憲書展鬥人氣
書展向來都係名人晒馬之地，出書唔單止要賣得，搞簽名會條人龍仲要夠長至威。立法會議員葉劉淑儀今年就出咗本教英文嘅書，成功活化《城市論壇》嘅「維園阿哥」任亮憲亦出咗本《爆政》，講吓佢嘅社運感受。不過論人氣就似乎葉劉高啲，事關佢不但吸引咗大班八十後「粉絲」到場，連唯一唔入「C18」嘅五散人陳茂波都去撐佢。
陳茂波畀面撐場
葉劉今年出咗本書叫《跟葉太學英語》，驟眼見葉劉嘅「粉絲」認真唔少，有專程嚟買書返去學英文嘅八十後，亦有好多係葉劉嘅忠實支持者。五散人陳茂波（Paul）亦喺簽名會完結前趕到，仲一口氣買咗五本書畀佢簽名，不過就唔係買畀佢嘅五散人兄弟，而係畀班跟佢做嘢嘅實習同學仔，等佢哋學好英文。
維園阿哥今次亦同「星屑醫生」歐陽英傑一齊合作出書講社運，不過由於黨主席陶君行喺同一時間又搞新書發布會，所以佢只係得前黨主席黃毓民撐場，人氣梗係差啲。佢話雖然係佢揀今日開簽名會先，但唔會介意阿陶搶客，事關阿陶黨務纏身，比佢難就時間喎！
