政情：林D9炒樓叻過搞政改
官場炒樓王又出手啦！過去廿年靠炒樓賺逾一千萬元嘅政制及內地事務局局長林瑞麟，近期再喺英國倫敦購入一個住宅樓花，講明打算作出租用途，投資意圖明顯。英國樓市同英鎊同處低位，林D9睇準時機，投資倫敦，投資策略應該比推銷政改高明。早前政改鬧得滿城風雨，身為重要旗手嘅林D9，仲有閒情越洋投資物業，橫豎佢炒樓咁有心得，不如以後開班教人炒樓，好過搞政改啦！
買樓花放租
最新嘅行政會議成員個人利益登記冊顯示，林D9喺六月八日向行會秘書處申報，同家人購入一個位於英國倫敦嘅住宅物業樓花，物業將於今年十一月落成，林D9打算將物業作出租用途。政府喺六月七日公布將政改方案提交立法會，以趕及同月二十三日表決，林D9就喺八日申報新物業，兩個標誌性日子如此相近，唔通林D9處理政改同炒樓，係同步進行？
林D9炒樓有一手，戰績彪炳。翻查紀錄，自八九年至今，林D9已經先後買入七個住宅物業，而且專攻升值潛力大嘅南區同中半山，其中五個已轉售，僅一單位損手，其餘四個均有斬獲，最和味嗰次係九一年以三百二十二萬元買入淺水灣華景園連車位，○五年賣出時淨袋八百五十八萬元，炒樓廿年賺逾千萬元。如果林D9處理政務都咁精明，咁就真係港人之福囉！
涉足倫敦物業市場嘅仲有行政會議召集人梁振英（CY）。據申報，CY喺六月七日通知秘書處，太太唐青儀喺英國Kensington擁有一住宅物業，作自住用途。據悉，CY嘅仔女都喺英國讀書，CY同太太亦成日去英國公幹同探望仔女，唔知係咪趁英鎊匯率低，所以買個物業方便自己。
不過，投資市場總有人扒逆水，環境局局長邱騰華五月十一日都向行會申報，其妻子以公司名義擁有一個位於灣仔區嘅住宅單位，作為出租用途。五月正係政府推出遏抑樓價措施後、樓價稍稍放緩嘅時候，趁機入市可以理解，之但係，林D9係公認嘅官場炒樓王，佢棄港樓而取英倫，邱騰華反其道而行，小心坐艇喎！