中環耳目：李應生食晏豪歎魚翅花雕
上海菜喺香港好受歡迎，位於灣仔世紀酒店嘅老上海飯店，就深受老饕追捧，早前卓妮撞到優質旅遊服務協會主席李應生（Tommy）同太子珠寶執董朱繼陶（Joseph）喺度食午飯。原來Joseph係協會執行委員兼市場推廣小組委員會主席，兩人約埋密斟會務，順便忙裏偷閒祭吓五臟廟。
Tommy係老上海嘅熟客，當日佢叫咗至愛菜式同老友分享，包括油泡蝦、脆鱔、火瞳翅同六月黃炒年糕等，食到Joseph讚不絕口。Tommy話油泡蝦蝦殼香脆、肉爽鮮甜。脆鱔都係必食之選，香脆又大件，火候控制一流。
Tommy仲預訂咗一大鍋火瞳翅，又粗又爽嘅魚翅用靚絕嘅金華火腿一齊燉，兩人邊食邊讚有錢都食唔到！美食當前，Tommy一時興起叫咗餐廳自釀陳年花雕，再佐以消滯嘅明前龍井，簡直係人生一大享受。
Tommy係中藥商百成堂第三代後人，仲係中華總商會會董及中藥業協會創會會長。最近佢成日掛住點樣幫優質旅遊服務協會旗下一千七百幾間會員推廣業務，責任重大嘅Joseph呢餐飯睇嚟唔係白吃！
