中環出更：許漢忠伉儷意國大豐收
機場管理局行政總裁許漢忠（Stanley）同太太經常有影皆雙，早前兩公婆又結伴去歐洲旅遊，仲掃咗好多名牌貨！Stanley露出勝利嘅笑容話，當地名牌西褲、恤衫價錢低過香港一半，佢哋愈買愈開心，兩、三年內都唔使再置裝添！
買名牌平港一半
Stanley同卓妮講，佢同太太去咗意大利旅行返嚟，此行目的有三個，就係睇嘢、買嘢同埋食嘢。佢話，唔知係歐元貶值關係，定係當地經濟真係好差，啲嘢冇以前咁貴。好似名牌恤衫，香港要賣一千幾元，但當地五百港元有交易。咁太太係咪都大豐收？佢笑謂梗係啦！
講開衣着，卓妮平時見Stanley多數戴紅色呔，但當日佢好罕見咁戴咗條淺藍色Lanvin真絲領呔，Stanley笑謂，佢衣櫃入邊嘅領呔唔係紅色就係藍色，咁樣顯得穩重啲嘛！呢啲就係高級行政人員嘅選擇。