中環出更：風中逛街王英偉掃減價衫
港區全國人大代表王英偉（Wilfred）貴為新昌營造及駿豪集團嘅副主席，又係房地產投資基金「太平星集團」大中華區執行主席，仲係「新人王」唱作歌手王梓軒嘅星爸，平時衣着執到正一正，一套筆挺西裝唔少得！Wilfred鍾情意大利Giorgio Armani西裝外，原來仲係另一意國品牌PAL ZILERI嘅擁躉，卓妮前晚就見到Wilfred喺ifc間PAL ZILERI掃咗萬幾蚊夏季嘅減價貨品，滿載而歸。
前晚近八點鐘，天文台正懸掛三號強風訊號，中環人流少咗好多，卓妮路過ifc三樓間意大利男裝PAL ZILERI專門店時，竟然見到一身灰色西裝嘅Wilfred喺入面買衫，見佢揀咗幾件唔同顏色嘅Polo恤及長短袖恤衫，仲有兩條皮帶，最後到收銀櫃面取出「黑卡」付款，盛惠萬幾蚊。Polo恤同皮帶原價平均一千五百元，打個五折，每件Polo恤八百蚊有找，抵到爛！
囝囝進軍日本歌壇
卓妮上前同Wilfred打招呼，佢話啱啱開完會，順路經過PAL ZILERI，見到大減價，咪睇吓有乜心水靚衫囉。其實Wilfred幫襯呢個牌子超過十年，以前只係喺連卡佛有得賣，依家就有專門店。佢大讚呢個牌子嘅服裝質料上乘又舒適，剪裁亦好啱亞洲人，買恤衫只需略為修改袖口，所以前晚佢放低咗幾件恤衫改袖口、同埋兩條要改尺寸嘅皮帶，等舖頭改完一次過將貨送到佢辦公室。
PAL ZILERI服裝面料顏色超過兩千種，運用傳統手工裁剪及手工縫製工藝，難怪能夠迎合男士們嘅時尚口味。
暑期又到，每年呢個時候都係商界大孖沙嘅旅遊季節，但Wilfred話工作太忙，今年暑假應該唔會外遊。不過，Wilfred一講囝囝梓軒就非常雀躍，透露梓軒將會打入日本市場，計劃喺日本推出唱片及開處女個唱，依家同監製揀緊歌，Wilfred到時都會抽時間飛過去日本為囝囝打打氣，認真廿四孝老竇！
卓妮