有李漢奸之稱嘅白鴿黨創黨主席李柱銘上月以退黨為武器，逼個黨否決政改方案，又話要離港兩星期諗清楚去向。點知佢返港已久，仍然婆婆媽媽，繼續扭扭擰擰，仲未決定去留。佢唔知係咪要厚住面皮搵下台階轉軚，或者等人挽留佢呢。
李漢奸尋日出席完白鴿黨嘅集思會後承認，佢咁拖拖拉拉，係對黨唔公平，亦都知佢一開始話考慮退黨，已對個黨造成好大傷害，但佢覺得自己一定要諗清諗楚，反思自己喺黨嘅影響力，先可以作出一個將來唔會後悔嘅決定，仲話大家鬧佢婆媽，佢都冇法子喎。
查實李漢奸近年下下同個黨打對台，反而去咗撐隔籬黨，佢喺黨內嘅影響力已大減，佢就算退黨，「殺傷力」都唔大。好明顯，李漢奸畀自己聲言退黨嘅豪情壯語玩死，依家騎虎難下，唔知點轉軚留低，或者等黨員挽留佢啩，不過佢尋日亦自爆話，喺會上冇人利用自己嘅發言時間說服佢留低。