政情：梁鳳儀撰文博加分？
上任快兩年嘅一班副局長同政治助理，成日畀人話知名度低，財經事務及庫務局副局長梁鳳儀嚟緊就有新搞作畀大家睇，為中文大學新書撰文，分享當年做記者時嘅採訪故事。時間咁啱喺政府公布副局政助中期評核報告嘅敏感時期，梁鳳儀有文出街，有番啲人氣，唔知有冇為佢嘅評核加分呢？
前職係金融管理局助理總裁嘅梁鳳儀，好多人都唔知佢讀新聞出身，度過十年記者生涯，今次為中大新聞與傳播學院嘅新書《一人一故事——新聞人的心聲細語》撰文，變相向公眾軟銷呢段青澀歲月。
梁鳳儀篇文以八七年台灣宣布結束戒嚴，容許台灣居民返內地探親為時代背景，講述時任記者嘅佢，跟一個台灣老兵熊伯返南昌老家探親嘅所見所聞，而結語就係，熊伯嘅故事提醒佢，每一個政策背後都係人嘅故事，令佢「唔會忘記為政者制訂政策以人為本嘅目標」。呢句話值得特區高官好好咀嚼，尤其係煲呔曾呀！