政情：立會新例嚴防白撞
上個月廿四日，立法會如火如荼討論政改，一班菜園村村民浩浩蕩蕩殺入立法會大樓，原來係民主黨議員李永達約咗佢哋嚟，同運輸及房屋局副局長邱誠武開會傾申請復耕牌照。立法會因為傾政改，門外門內氣氛已經好緊張，點知高達唔醒目，幾乎點起另一個惹火嘅題目。立法會秘書處大為緊張，於是又要着手填補漏洞。
秘書處早幾日向全體立法會議員發通告，講解公眾進入立法會大樓同中區政府合署議員辦事處嘅新安排。由即日開始，立法會議員若要喺立法會大樓會見市民，必須事先通知秘書處，方便保安核實訪客身份。如果唔能夠事先通知，秘書處有可能會聯絡負責嘅議員，核實訪客嘅身份。至於中區政府合署嘅新安排同立法會大樓大同小異，管理處方面特別指明要議員注意，安排公眾到訪嘅議員需負責訪客喺政府合署裏面嘅行為。
議員會見市民嘅新規定，影響全體議員，高達都算累街坊囉。