政情：扮嘢文牛一獻吻撐葉劉
海洋公園主席盛智文同立法會議員葉劉淑儀老友鬼鬼，貴人事忙嘅佢尋日畀足面出席匯賢智庫嘅新秀介紹會兼成立四周年慶祝會，期間仲自爆同匯賢智庫同一日生日，搞到葉劉鬼咁驚喜！
自認得廿四歲
尋日亦係匯賢智庫成立四周年，葉劉趁機向傳媒介紹幾位新徒弟，扮嘢文仲自爆喺尋日生日，全場即時起哄，扮嘢文徇眾要求下向葉劉獻吻，仲足足錫咗四、五秒添。扮嘢文話，自己一向關心香港發展，政改方案通過之後希望社會更加穩定，同時畀香港年輕人更多發展機會。扮嘢文又話好享受依家嘅生活，佢仲有好多嘢想做，雖然自己得廿四歲，但就唔打算從政喎。
講番尋日幾位新星，佢哋貫徹匯賢智庫吸納尖子嘅政策，其中負責頂替特首辦特別助理陳岳鵬喺智庫政策發展總監職位嘅，係牛津大學碩士姚振鴻，而另外兩位新星施俊輝同劉絜文就分別喺會考得到十優同七優。葉劉不斷吸納優質新血，唔知明年嘅區議會匯賢智庫可以搶到幾多個議席呢？