政情：政黨大孖沙落區搵位
政治免費午餐年代過去，呢個時勢，從政想唔身水身汗都唔得。政改本地立法建議秋季出爐，政府尋日打開口牌，傾向由民選區議員參選五個「超級議席」，即係話，多個政黨嘅重量級人物，好似工聯會陳婉嫻、自由黨田北俊同民主黨單仲偕（
雞），若有意爭議席，就要焗住摺起衫袖，出年落場參選區議會，牽一髮動全身，隨時影響各黨嘅全盤區選部署。
二○一二年立法會選舉，五個新增區議會功能界別議席勢成焦點。繼政府早前向立法會提交文件暗示，只容許民選區議員有權競逐呢五個超級議席後，政制及內地事務局局長林瑞麟尋日直頭表態，從法律角度，為令五個超級議席符合功能界別定義，政府傾向維持原有立場，規限由現任民選區議員提名同參選。
擬全港一個選區進行
「林Ｄ９」又指，由於五個超級議席面對三百萬名選民，所以有必要將選舉經費上限增加至大過分區直選，間接默認政府對議席嘅選舉模式亦有取態，就係以全港一個選區進行嘞。「林Ｄ９」話，會諮詢各界意見，秋季先至有具體建議喎，不過，政府已有取態，睇怕都幾難翻案囉。
超級議席參選資格從緊，即刻有人發愁。民主黨、自由黨同工聯會都曾要求，擴大參選資格至前任區議員，咁啱三黨當前最有機會落場競逐嘅重量級人物，都掛住前區議員牌頭喎，好似雞做過葵青區議會主席、田少曾勝出山頂選區，同埋嫻姐做過東區區議員咁。
如果「林Ｄ９」嘅說話已經係定案，嫻姐三人必須先喺明年區選勝出，才有資格爭逐超級議席。俗語話：「氹仔浸蛟龍」，政治明星敗走區議會屢見不鮮，民主黨李華明就領教過滋味，嫻姐三人要跨過呢個心理關口，殊不容易，而且，對明年十一月區選，各黨布陣已幾近尾聲，三人係咪落場，短期內就要作抉擇，以便變陣，今次真係頭痕囉！
民主黨主席何俊仁話，「林Ｄ９」嘅說話唔代表政府已關上商討大門，大家又睇吓，最後結果係咪好似政改談判咁峰迴路轉？