中環耳目：梁美芬愛OLE聲色味俱全
立法會議員梁美芬平時畀人好理性嘅感覺，事關佢喺大學教法律，又計得好精準，識得用捉老鼠上位，但其實佢都有感性嘅一面，早前卓妮見佢喺雪廠街西班牙餐廳OLE食午飯，原來佢最愛呢度嘅環境，歎美食之餘又可以令自己鬆弛一番！
必食西班牙沙律
當日佢叫咗必食嘅西班牙沙律，同埋味香四溢嘅西班牙海鮮飯，餐廳經理Billy見熟客又嚟幫襯，特別推介皮脆肉嫩嘅燒乳豬、墨汁墨魚等招牌菜式。梁美芬話，幾年前朋友介紹佢嚟OLE食嘢，從此OLE就成為佢私人飯堂。
事關梁美芬曾經喺巴黎求學，歐洲食物好啱佢胃口，呢度有大玻璃，環境一流，尤其是喺輕快音樂伴奏下，食嘢零舍好味道，又可以洗滌心靈。佢愈講愈有詩意，話望吓窗外充滿生氣嘅中環街景，辛勞苦悶都可以一掃而空！所以有時佢會喺度寫書，笑謂有事半功倍之效㗎！卓妮見佢咁鍾意歐洲，問佢有冇試過同歐洲俊男拍拖，佢笑住話，唔話你知！