中環出更：超鳳識貨精挑鎮店甜品
喺甜品面前，再有定力嘅女人，都敵不過誘惑。卓妮早前見賭王千金何超鳳喺進駐香港無耐嘅京都蛋糕店Patisserie Yamakawa，睇住七彩繽紛嘅蛋糕心大心細，最後認真挑選咗幾件買走，顯然係甜品迷一名。
京都蛋糕 用料講究
名媛超鳳貴為人母，家頭細務有傭人代勞，唔使佢操心，不過佢逛超市選購食物仍然親力親為。卓妮日前行經中環ifc嘅city'super，撞見超鳳喺Patisserie Yamakawa嘅蛋糕櫃前駐足欣賞，邊睇邊手指指，詢問店員每款蛋糕有乜特別。店內甜品款式多達四十種，唔同嘅系列又有唔同款式，超鳳開心到好似小女孩咁，落足眼力慢慢揀。
諗咗十分鐘，終於決定叫店員包起兩件法式焦糖燉蛋同一件焦糖燉蛋布甸，似乎對燉蛋情有獨鍾，三款甜品合共八十二元。一次過買三件咁多，千金同老公一定有份受惠嘞。畀完錢後，超鳳拎住甜品歸家，盡顯慈母本色。
講番Patisserie Yamakawa蛋糕，係由具有四十幾年甜品經驗嘅山川良廣師傅創立，佢出名用料講究，香港店嘅材料以至製法，全部忠於日本總店，當中以栗子布朗蛋糕及抹茶慕絲餅最受歡迎。山川師傅講明，綠茶粉非京都頂級宇治綠茶不用、紅豆嚴選北海道十勝紅豆、朱古力醬則用上法國Valrhona 64%朱古力，至於超鳳所揀嘅燉蛋及布甸，更係鎮店之寶，入口香濃軟滑。
店內仲有多款混合法式及日式風味甜品，包括奶凍、卷蛋、芝士蛋糕等，令甜品迷心花怒放。
卓妮