細路仔與人爭執，女的唔夠男的講，通常會用呢招：好衰㗎！蝦人嘅，我唔睬你！若然兩男拗頸，唔夠講的一方就會話：你無理取鬧，我同你講都戇居！《孟子‧公孫丑》有云：詖辭知其所蔽，淫辭知其所陷，邪辭知其所離，遁辭知其所窮。
孟子的「言語觀人法」真是一面照妖鏡，孟子那幾句，是說：偏頗的言辭，知道它遮蔽在甚麼地方；過分的言辭，知道它失誤在甚麼地方；邪僻的言辭，知道它背離正道在甚麼地方；逃避的言辭，知道它無理在甚麼地方。
煲呔曾在答問大會接受議員提問，對某些議員的嚴辭盤詰，尤其涉及民生經濟，一味帶人遊花園，一時又話「做大個餅」，六項機遇產業要進入產業結構，取代獨沽一味的金融業。真係講就天下無敵，「做大個餅」——賣豐胸廣告啊？唔該睇吓香港旅遊業，有導遊如潑婦一輪嘴不停罵內地同胞唔買嘢嘅片段在內地傳媒狂播，香港「購物天堂」已徹底蒙污！
煲呔曾「遁辭知其所窮」，唔夠人講，又搬出九七前立法局主席座位背後牆上掛着的徽號，佢又法文又英文的解個不停，叫人唔好惡言相向，否則，必自食其「惡」！
港英年代遺留落嘅陳年舊史，煲呔曾當正係水泡，正應了「中河失船，一壺千金」呢句話，一隻大船開出去，到了河中，船壞了，狂呼「起錨」都冇用，船上的生命財產都要完蛋，此時，何物最貴重？一壺千金啊！要救命嘛！船沒了，抱到那個葫蘆，有浮力，人就死不了。
今煲呔曾辭窮，廢廢地攬住句港英餘孽留下的「金句」，趣趣地又答完過骨啦！