政情：田少轟胡兆英 監管導遊不力

香港女導遊喺旅遊巴辱罵內地遊客嘅片段，熱爆全國網絡，香港旅遊業形象一落千丈，旅發局主席田北俊尋日直斥事件令港人丟臉，出口批評經濟動力胡兆英做主席嘅旅議會對業界監管不足。旅議會成眾矢之的，胡兆英急補鑊，強調若事件屬實，導遊最嚴重或被釘牌；旅行社如證實違規，會被重罰二十萬元甚至釘牌。不過導遊強迫旅客購物，癥結在於內地常以超低價招客，衍生連串問題。旅議會一日唔解決呢啲深層次問題，釘幾多牌都冇用。