政情：康泰一姐畀團友鬧喊
末代會考生就放榜，又係時候搵成功人士分享成功秘笈。中五畢業後就喺康泰旅行社由初級文員做到總經理嘅劉美詩（Susanna）自爆初出道帶團時曾被團友用粗口鬧到喊，爭啲想辭職，好彩佢對旅遊業有團火先捱到卅二年。
香港青年協會尋日請咗Susanna同班學生哥分享，佢話當年讀完書出嚟做嘢，初頭咩都要做，出街送信、去航空公司出機票、拎住大疊護照去領事館搞簽證、影印填表咁，統統做過。佢無好似依家啲後生咁成日埋怨，反而爭取學習機會，不時向前輩偷師，三個月就畀佢升做領隊。Susanna好自豪咁話，第一次帶四十幾人去泰國，因為事前工夫做到足，無一個客發現佢係新丁兼第一次出埠。
第二次就考起佢喇，因為當年曼谷搞亞運會，第一日到埗就有五、六間房攞唔到，惟有問有冇家庭肯屈蛇一晚，但有男團友就起勢用粗口鬧佢，佢忍住一泡眼淚叫自己冷靜處理，最後剩番八個人去第二間酒店暫住一晚，Susanna終於忍唔住喊出嚟，反獲團友安慰佢、讚佢做得好。所以話，每個香港人，都有一個香港故事。