政情：張建宗唔休會唔食飯
到尋晚十二時截稿為止，立法會審議《最低工資條例草案》搞咗三十幾個鐘都未完成討論，主責嘅勞工及福利局局長張建宗都坐足三十幾個鐘，分分鐘坐到腰骨痛。職工盟議員李卓人前日留意到張建宗聽咗好耐都冇食飯，提醒佢要注意職安健。不過張建宗尋日依然堅持坐喺度聽晒議員發言，無論助手點叫佢都唔肯出去食晏。立法會主席見佢咁堅持，中午宣布暫停會議二十分鐘，等張建宗有時間食個飯，唔好弄壞身子，都算體貼。
其實平時問責官員都會聽晒議員發言，但去到「長命會」，就可能行開行埋，爭取時間休息吓。勞福局無副局長，張建宗自然要跟緊啲，以免有蝦碌出現。咁長嘅會，保安局局長李少光都體會過。○六年立法會審議《截取通訊及監察條例》草案，前後傾咗五日，當年光哥作為主責官員，除咗中途去洗手間，唔敢點行開，點知有次行開咗三分鐘，因為預先發言嘅議員無講嘢，當時主持會議嘅前立法會主席范徐麗泰叫光哥回應，點知見到個位吉咗，焗住暫停會議，仲笑光哥得到「自然的呼喚」，場面尷尬。今次張建宗唔去食飯，搞到立法會要暫停會議。