政情：李漢奸資助大專2012玩補選

外號「李漢奸」嘅民主黨創黨主席李柱銘，今年初聯同壹傳媒集團主席黎智英等「搞事四人幫」搞密室飯局，企圖逼民主黨參與五區總辭，為「變相公投」造勢，其後被民主黨元老司徒華踢爆事敗。參與補選落敗嘅「大專2012」成員黃永志近日向選舉事務處提交選舉開支報告（圖），揭發李漢奸捐咗三十萬元畀「大專2012」五個候選人參選，五人均分後每人有六萬蚊。呢次李漢奸想唔認出錢出力推動「變相公投」都唔得啦！

「大專2012」五名成員參加五區補選時，曾被人思疑係疑似社民連「Ｂ隊」，催谷選情。我哋翻查九龍西候選人黃永志嘅選舉開支申報，赫然發現，李漢奸有份財政資助「大專2012」候選人參選。黃永志選舉開支總共用咗十三萬六千元，而籌得捐款約十三萬蚊，其中以李漢奸嗰六萬蚊最大份，佔咗一半。三十萬元話少唔少，等如一個普通清潔工嘅幾年人工，李漢奸咁大手筆支持「大專2012」參加補選，話無其他意圖，真係搵鬼信！

為應屆會考生打打氣，請瀏覽on.cc《放榜無限分2010》專輯