政情：立會煞科議員請食燒豬
立法會今屆會期即將完結，回望過去一年，發覺今年馬拉松會議特別多，好似一月嘅高鐵撥款、六月嘅政改方案，仲有呢幾日審議緊嘅最低工資，全部都開幾日會先傾得完，立法會秘書處同保安部職員嘅工時因而拉長咗好多。各議員為答謝秘書處同保安嘅辛勞，尋日夾錢買咗兩隻大燒豬請立法會職員食，聊表心意。
首次慰勞秘書處
切燒豬儀式由內會主席劉健儀（Miriam）同立法會秘書長吳文華（Pauline）主持，Miriam話今次係第一次立法會議員一齊請秘書處食嘢，有四十幾個議員每人夾咗二百幾蚊，不過就唔肯透露有邊啲人冇夾錢。Pauline就代表秘書處好多謝大家嘅關心，話會將燒豬分畀唔同辦事處嘅職員，不過成個秘書處夾埋成四百幾人，兩隻燒豬好可能唔夠分噃！
勞工及福利局局長張建宗同「鼠王芬」梁美芬尋日都掏荷包慰勞大家，兩人不約而同都係請食水果，等大家食完燒豬之後可以清吓腸胃，都算細心！