政情：衝出香港放眼國際
香港青年協會尋日搞咗個青年領袖論壇，邀請一班金融業同商界星級人馬，同接近一千個學生對談，包括滙豐控股行政總裁紀勤、港交所主席夏佳理、港鐵主席錢果豐、總商會主席胡定旭，同埋財經事務及庫務局局長陳家強。喺論壇上，啲嘉賓除咗勉勵年輕人要勇於面對挑戰、認識競爭對手之外，幾乎異口同聲提醒香港青年要「走出香港、面向世界」，唔可以故步自封，即係唔好做「井底蛙」！
紀勤喺論壇上發表專題演講，佢講到現今青年人務必做好「改變」嘅準備，因為佢發現依家香港嘅年輕人好多寧願選擇留喺屋企（tend to stay at home），唔肯去外地工作同見識。紀勤寄語年輕人要有國際視野，要有信心應對挑戰，咁先可以帶領香港向內地同世界進發。
紀勤語重心長勉勵與會年輕人，話冇嘢比自信心更重要。佢仲以自己為例，提到當初入滙豐時根本未有學位，但係佢從未失去信心，亦唔會睇小自己，言下之意叫班青年莫因學歷低而睇小自己。紀勤更提到，幸福嘅家庭係成功人士背後其中一項最重要元素，忠告所有人發展事業之餘，亦要兼顧家庭，各方面取得平衡先係成功之道。
認識社會 增競爭力
紀勤一再提醒青年要有國際視野，與會嘅港鐵主席錢果豐亦有同感。佢提起舊年一班港鐵新入職嘅年輕人，被安排去瑞典工作，當地冬天日短夜長，可以話「不見天日」，雖然係咁，班年輕同事適應力相當強，工作亦做得頭頭是道，令佢好欣慰。錢果豐寄語話，年輕人除咗讀書要叻之外，適應力同樣要強，即使係惡劣環境之下工作亦唔會受到影響，最重要仲係肯衝出香港，咁先可以成功。
有學生問到錢果豐聘請新員工有咩要求，讀經濟出身嘅佢就話，除咗要有國際視野之外，亦要對社會有認識。佢話通識對學生好重要，即使讀財務系嘅學生亦要有一定人文質素，畢業後先可以做一個有競爭力嘅現代年輕人。紀勤同錢果豐日理萬機，兩位肯花咁多時間同班學生分享人生經驗同道理，唔知大家又聽唔聽得入耳呢？