中環出更：中總千萬翻新金碧輝煌

天花板鋪金箔

裝修咗八個月嘅中總大廈，尋日以新貌迎賓，逾二百位政商界名人畀面捧場。卓妮一睇，地下大堂、五樓接待廳同八樓大禮堂已煥然一新，布置以閃爍金色為主調，原來別有玄機。蔡冠深話，五樓逾四千呎接待廳嘅天花板，全部鋪上金箔，因為金色寓意發財，希望商會會員個個賺到笑。

設計仲有另一特色，就係將人民大會堂接待廳照搬過嚟，地方雖然冇咁大，但格局有九成相似。至於八樓大禮堂，亦參考禮賓府設計，主調用白色，天花板加上一盞埃及巨型水晶吊燈，感覺光猛晒。新大廈咁堂皇，中總榮譽會長曾憲梓忍唔住嚟參觀吓，佢邊睇邊露出滿意嘅笑容，仲當眾大讚蔡冠深膽識夠，實事求是，將中總搞得有聲有色！

貴為「福布斯」富豪嘅「海產大王」蔡繼有接班人蔡冠深，為中總出錢又出力，自揼心口捐五百萬元，其他中總高層亦一呼百應。副會長「牛仔褲大王」楊釗捐二百五十萬元，榮譽會長霍震寰同張永珍各捐二百萬元，金利來集團行政總裁曾智明及「新金王」黃英豪各捐一百萬元，副會長方文雄、張成雄及李德麟就各捐五十萬元。中總上下一心，認真唔話得！

張永珍（右）同田北辰表情誇張，唔知傾緊乜呢？

逾四千呎嘅中總接待廳，天花板鋪上名貴金箔。