煲呔曾不得民心，行政會議成員又個個公開同佢唱反調，完全係腹背受敵。不過佢尋日喺答問大會上就死口唔認有行會成員反骨，仲話行會召集人ＣＹ梁振英高調話要復建居屋嘅行為冇問題，等同頒面免死金牌畀ＣＹ。ＣＹ知道當然好高興，仲即刻將相關嘅新聞轉貼到網誌。
ＣＹ前排間唔中就倡議復建居屋，直情當港府依家做緊嘅資助置業諮詢冇到。尋日立法會答問大會上，公民黨議員陳淑莊狂插行會嘅集體負責制名存實亡，煲呔曾政府已經變成「跛腳鴨」政府。不過出名ＥＱ低嘅煲呔曾，不但冇黑面，仲力撐ＣＹ，話任何政策，包括房屋政策，只要喺諮詢階段，意見百花齊放並無問題，指行會仍然操作良好。不過煲呔曾最後都加咗句，如果政府已經就某一政策拍板，行會成員就要同心同意落實政策。咁咪即係話畀大家聽行政會議傾過啲乜？咁嘅行會，又幾透明喎。