中環出更：湯顯明陳詠梅地下情曝光
政圈一直流傳廉政專員湯顯明（Timothy）同前入境處助理處長陳詠梅（Helen）拍拖，但一直只聞樓梯響，關係疑幻疑真。尋晚前商務及經濟發展局局長馬時亨喺中環馬車會所搞咗個「一桿入洞慶祝飯局」，呢對緋聞男女首度現身。 Helen唔識路，搵Tim湯做「盲公竹」。男方沿途好Man，為伊人開路，「好朋友」咁體貼，伊人唔冧就假。
曾被人目睹與Helen結伴去鑽石山荷里活廣場睇戲嘅Tim湯，尋晚同伊人結伴去肥亨飯局，半公開大家關係。晚上六點五十七分，兩人並肩喺中環鬧市出現，放緊退休前休假嘅Helen穿上黃底黑花唐裝，內襯小背心，戴上佛珠嘅玉手挽住LV袋，另一隻手拎住一袋禮物，擺出小鳥依人姿態跟住Tim湯行。當抵達萬邦行馬車會會所樓下，湯Sir笑咪咪向Helen話：「係呢度嘞！」
面都紅晒 一味傻笑
男方帶路有功，伊人梗受落喇！但一見到卓妮，兩人馬上彈開。卓妮問Tim湯係咪嚟賀馬生，有冇同肥亨一齊打高球？Tim湯竟然扮到乜都唔知，一臉愕然咁話:「我唔知馬生（馬時亨）請客喎。」唔講飯局，咁講吓Helen喇。卓妮問佢係咪同Helen拍拖時，Tim湯面都紅晒，一味傻笑，惟有拿拿臨同伊人步入
。
兩人留到夜晚十點十分離開，仲拉埋一齊赴宴嘅新聞處處長黃偉綸齊齊落，但三人出門口後就各行各路，黃偉綸快步走過對面馬路，Tim湯與Helen就雙雙登上廉政專員專車BE5515絕塵而去。Tim湯盡顯風度，載Helen返回堅道寓所。不過Tim湯冇送伊人上樓，Helen落車後獨自步行一小段，返回堅道金谷大廈寓所。伊人警覺性甚高，一步三回頭，唔通驚畀人跟蹤？
Tim湯同Helen連去飯局都約埋一齊，關係不言而喻嘞。查實湯Sir同Helen千里「友緣」一線牽，話說男方喺九九年至○三年間出任保安局副局長（後改稱保安局副秘書長）時，已認識當時喺入境處嶄露頭角嘅Helen。
樣子清秀有氣質嘅Helen，琴棋書畫樣樣精，堪稱紀律部隊才女。回歸後更成為首位女助理入境處長，成為城中佳話。Helen同Tim湯同愛打高球，更結伴返內地打波，未知係咪因為咁，擦出火花？
卓妮