中環出更：肥亨一桿入洞豪宴慶功
中策集團主席馬時亨今年五月佛誕喺東莞海逸高爾夫球會，打出十七年來首次一桿入洞（hole in one）佳績，興奮得要請食飯慶祝。餐飯籌備咗一個月，尋晚喺中環萬宜大廈馬車會所筵開六席，肥亨嘅政商界娛樂界好友及高球波友紛紛到場恭賀，人到禮又到，相當畀面！肥亨禮尚往來，預咗靚紅酒及豐富節目娛賓，仲送贈印有「我要打好呢個窿！」嘅T恤，鼓勵未試過一桿入洞嘅好友。
「我要打好呢個窿」
肥亨與太太王培琪好早到場招呼朋友，傍晚六點幾賓客陸續到場，包括舊老闆前財爺梁錦松、盈拓副主席袁天凡、鷹君集團主席羅嘉瑞、保安局局長李少光、特首辦主任譚志源、商務及經濟發展局常秘蔡瑩璧、表弟曾志偉、身為高球教練嘅前港姐鄭文雅、中國高球好手張連偉夫婦、深圳觀瀾湖球會行政總裁朱鼎健（Ken）、經濟動力林健鋒（Jeffrey）及梁君彥、專業會議成員石禮謙、商界黃宜弘等，仲有孖住到場嘅廉政專員湯顯明及前入境處助理處長陳詠梅。
為恭賀肥亨，阿Ken專程由深圳來港，仲帶咗一百筒印有「Fred Ma hole in one」嘅高球送畀肥亨做抽獎禮物。Jeffrey就送咗一個純銀高球座擺設，認真唔話得。為答謝好友畀面，肥亨攞出兩支靚紅酒與好友分享，包括1997年Petrus及1988年Mouton Rothschild，佢仲攞咗當年印作自我鞭策嘅一批「我要打好呢個窿！I’ll get this hole！」T恤，送畀未試過一桿入洞嘅好友。
尋晚有兩項特備節目，包括鄭文雅獻唱金曲，仲有大家即場切磋球技，總之大家盡興而返。
卓妮