政情：梁美芬相識滿天下
最近忙於處理香港鼠患問題嘅專業會議立法會議員梁美芬（Priscilla），嚟緊暑假會同家人去奧地利、法國同荷蘭三國充電兼探朋友。首站維也納會住喺奧地利國會秘書長嘅屋企，原來佢哋兩家人非常老友，大家啲仔又差唔多大，早前對方來港訪問，都係喺Priscilla家中留宿。
之後嘅法國之旅，佢哋就會去巴黎凡爾賽同葡萄酒勝地波爾多。原來Priscilla後生時去過凡爾賽大學交流，想重遊舊地，見番當年啲老師及同學。至於波爾多都去埋，就因為佢老公城大法學院院長王貴國係愛酒之人，喺波爾多亦有朋友接待，帶佢哋遊覽當地知名酒莊。不過此行嘅重頭戲係喺尾站荷蘭，王貴國將應邀喺當地嘅海牙國際法庭發表演說，講解國際貿易法，仲係首位華人法律學者獲得咁嘅待遇。
Priscilla歐遊返港後停留一日，隨即又啟程去西藏，今次又係探朋友。原來早前有批西藏法官落咗嚟香港交流，今次去探番班法官朋友，佢兩夫婦果然係相識滿天下！