政情：愛女放洋甘威掛心

甘威嘅囡囡喺中西區一間女校就讀，年紀輕輕已好獨立，自己走去申請交流生計劃，結果獲派入住奧地利維也納一個義工家庭，暑假出發，一年後先至返港。甘威尋日話，囡囡獲義工家庭提供食宿，只須負擔一年一萬蚊美金嘅學費，折算港紙大約八萬蚊，算係超值，咁啱囡囡又鍾意古典音樂，平日愛吹色士風，而維也納又係古典音樂之都，囡囡可以到當地留學，梗係開心啦！唯一問題係，囡囡一句德文都唔識，所以拿拿臨報讀咗個九個星期嘅德文課程，學番幾句日常用語傍身先至起程。

出國留學，不失為擴闊視野好方法，但為人父母始終掛心，甘威話，無法啦，交流生計劃嘅主辦機構開到口，唔建議父母探子女，畀空間學生學習獨立生活，所以甘威決定一年內都唔去探個女。