政情：肥胡請家己冷 睇王者之戰
西班牙稱霸世界盃，全城陷入瘋狂。智經研究中心主席胡定旭尋日凌晨都call齊身為「智經之友」嘅潮州商會青委會成員，喺智經地頭睇直播。肥胡無懼肥肚腩，邊睇波邊歎小食，更罕有地落注賭波考眼光，貼荷蘭隊贏，可惜最後泡湯！
身為「家己冷」嘅肥胡向來重鄉情，尋日一於以「潮青」名譽顧問身份，叫埋「潮青」主任張俊勇（Thomas）同埋身為潮青成員嘅民建聯新星鄭泳舜、成豐片廠執董胡炎松，以及前智經暑期實習生合共三十人，深夜兩點幾喺金鐘智經辦事處睇決賽。
借出地方，仲要自掏腰包請食嘢，肥胡話一切志在以波會友，事關佢心水嘅愛隊早已出局，惟有轉軚捧荷蘭，當踢到七十分鐘後，肥胡落注買荷蘭同西班牙以零比零完場，結果畀佢貼中，可惜最後因為押注荷蘭贏波，贏頭輸尾嘞。肥胡話，輸贏好閒，最緊要開心。
同場嘅Thomas都係荷蘭迷，但就冇賭波。講起今屆世界盃歐洲強隊大熱倒灶，令球迷滿地眼鏡碎，Thomas分析話，今年各隊實力平均，皆因星級球星太錫身，留力打職業賽，好似巴西隊就表現麻麻，令佢好失望，咁嘅形勢，反而啲新星有機會突圍而出。