政情：續掌財會卿姐穩坐釣魚船
政改方案獲通過，香港政治生態勢必有變。政改一役後多咗花名叫「揮手卿」嘅民主黨副主席劉慧卿，下星期二以財務委員會主席身份發表年終總結之後，又要諗定暑假後復會點打財會主席連任戰，但今次佢應該輕鬆啲，甚至連拉票信都慳番，事關卿姐撐完政改，喺立法會光譜企近民建聯多過社民連，建制派未必會再派人搶位，卿姐極有機會喺無對手下輕鬆冧莊，成為政改新形勢下嘅受惠者。
每年立法會復會，卿姐都要為競逐連任財會主席操心，想盡辦法拉票。雖然每次都能爆冷勝出，但次次都屬險勝，最經典係○六年建制派派出民建聯陳鑑林挑戰卿姐，二人得票竟然打成平手，卿姐最後要以抽籤決勝，捏一把汗。
論形勢，本來復會後正係建制派重奪財會主席嘅好時機，事關政改一役，民主黨因撐政改而遭受社民連追打，兩黨割蓆，卿姐選財會，隨時走失社民連三票，形勢不利。不過，政治有時就係咁弔詭，建制派依家想扳倒卿姐嘅意欲，反而係歷年最低，好可能未必再派人競逐財會主席。
西環中環論功行賞？
有建制派議員指，以前建制派要喺卿姐手中搶回財會主席職位，多少係代西環同中環出手，但今次政改方案獲民主黨力撐下得以通過，卿姐發揮咗一定影響力，論功行賞，無理由再留難卿姐，更何況「６２３」政改方案表決，卿姐走向建制派支持者面前揮手，獲拍掌歡呼回應，呢場罕見嘅和諧情景，隨時已令西環同中環打消阻攔卿姐執掌財會嘅念頭。
此外，建制派要扳倒卿姐，技術上亦有難度。過往中總代表黃宜弘同陳鑑林都試過同卿姐對撼，可惜二人喺建制派內牙齒印唔少，由於走票而鎩羽而歸，而建制派內具分量挑戰卿姐嘅人係民建聯主席譚耀宗，但譚Sir本身已經擔任緊政制事務委員會主席同議事規則委員會主席等幾個重頭職務，分身不暇，所以喺難覓合適人選嘅情況下，建制派舊年已無搵人挑戰卿姐，依家政改新形勢下，就更加無謂勉強出戰啦。
卿姐若然可以無風無浪連任財會主席，固然飲得杯落，不過，咁嘅場面意味建制派唔再當卿姐係死敵，喺香港非敵即友嘅二元對立氛圍下，卿姐呢個新定位，對佢一二年選情係好事定壞事，就好難講囉。