中環耳目：羅開揚巡舖必食意粉
大快活集團主席羅開揚（Dennis）出身飲食界大家族，品嘗美食嘅本事可謂與生俱來。佢最鍾意食意大利菜，巡舖時都會揀意大利粉做午餐，大快活嘅肉醬意粉同埋咖喱意粉都係佢至愛。
Dennis接掌父親羅芳祥創辦嘅大快活多年，喺佢悉心打理之下，依家香港已有九十六間大快活、三間友天地茶餐廳同埋兩間特色餐廳，集團形象愈見年輕化。羅氏家族喺本港飲食界舉足輕重，大家樂創辦人羅騰祥、維他奶創辦人羅桂祥同羅芳祥係三兄弟。
卓妮喺大快活業績發布會見到Dennis，咪睇佢好嚴肅，其實同佢傾美食好開心。佢話好鍾意食意菜，經常幫襯名人食肆Da Domenico。即使喺自家快餐店用膳，佢都會揀食意大利粉，至愛肉醬意粉同埋咖喱意粉，一星期至少食兩、三次添！
大快活意粉彈牙爽口，秘訣係使用特純初榨橄欖油烹調。至於阿活咖喱係由三十幾種香料、再熬十個小時而成，夠晒香濃、有層次感，難怪連老細都回味無窮。