中環出更：曾智雄裝身愛潮牌
如果你係廣告迷，相信當年金利來嘅橫紋、斜點、波點、淨色領呔廣告，大家一定唔會唔記得。作為一個咁成熟嘅品牌，自然令人覺得同樣成熟嘅太子爺曾智雄（William），都係一樣鍾意呢類型嘅男士品牌。
如果你都係咁樣諗就錯晒啦！身為香港青聯前輩嘅William，雖然處事成熟，不過衣着打扮就非常緊貼潮流，一啲都唔out。好似早前佢出席活動，就着咗對差唔多成千八蚊、好多年輕人都鍾意嘅日本品牌Bape猿人牌波鞋，對鞋雖然係08年款，不過William仲keep得好好，估唔到佢呢位男士咁整齊。
William話平時工作忙，個幾月先會行一次街，除咗Bape，其他潮流品牌佢都鍾意，好似佢部iPad就配咗個潮人牛仔褲品牌ed hardy製造嘅iPad機套作保護。
William仲話，買嘢係自己嘅事，從來都唔會假手於人，所以唔使太太做佢軍師陪買衫。話時話，William咁潮又肯接受新事物，睇嚟遲下佢同就嚟出世嘅BB都唔怕有代溝啫。