中環出更：詩姐High Tea 狂掃朱古力
被封為最紅「政治紅娘」嘅基本法委員會副主任梁愛詩，近日急發聲明，為「中間人」身份降溫。詩姐要低調，尋日寧願缺席一個公開活動，約朋友去COVA high tea，飲完茶後再走去掃幾盒法國殿堂級朱古力La Maison Du Chocolat。莫非化解咗一場政治危機嘅詩姐，想慰勞吓自己？
尋日下晝五點幾，卓妮喺太子大廈巧遇詩姐，中環係詩姐地頭，撞見佢冇乜咁奇，奇就奇在尋日下晝四點半，本來有個《中國旅遊》書籍卅周年酒會，寫明詩姐會去，可惜詩姐甩底無現身，主辦單位只係解釋，收到通知話詩姐唔出席喎。
個幾鐘頭後，詩姐喺太子大廈出現，同兩位男性友人碰面後，直奔歷山大廈COVA歎茶。食完甜品嘅詩姐嫌未夠喉，兜番轉頭去太子大廈嘅La Maison Du Chocolat買朱古力。
拒回應政改話題
趁詩姐步出門口時，卓妮上前打招呼，問佢買咁多朱古力做乜，詩姐一味甜笑。講起佢可以直達天庭，問佢近日係咪多咗人搵佢做「中間人」，穿針引線同中央溝通，詩姐見話題敏感，即時收斂笑容，話唔回應喎。
卓妮