政情：王國興腳大買鞋難
有「建制派長毛」稱號嘅工聯會王國興，鬧高官聲大夾惡，佢除咗把聲大，對腳都寧舍大過人，要着九號鞋，呢個尺碼香港鞋舖好少入貨，搞到佢試過行勻全條旺角波鞋街，都搵唔到一對着得落嘅鞋，失望而回。
王國興早前喺立法會走廊同我哋展示新買嘅波鞋，到底對鞋有幾大呢？鞋頭去到鞋尾，長過一張A4紙，問你驚未？平時表現差劣嘅高官小心呀，王國興平日狠批庸官青筋暴現，激憤難平，一旦情緒失控，學社民連掟蕉咁掟鞋，高官若然中招都幾係嘢。
王國興話，腳板巨型係父母遺傳，全家都係大腳八，佢着開嘅九號鞋，喺香港就好難買到，鞋舖少入貨，皆因無市場，亦印證佢呢位大腳八，喺香港屬稀有動物。所以王國興自己知自己事，平時買鞋無乜要求，唔睇款式，入到鞋舖只要有佢尺碼，就好似執到寶咁拿拿臨科水拎走，但佢試過行勻全條波鞋街都無收穫，佢展示嘅呢對鞋，係最近識到一個好心嘅鞋舖老闆，幫佢喺外地入貨，咁佢先至有得換新鞋，認真慘情！