政情：大輝博大霧捧唐唐
民主黨主席何俊仁早前話煲呔曾喺本港政制問題上「廢廢地」，相信出名ＥＱ低嘅煲呔曾聽到實激死，不過依家連建制派都當佢冇到。立法會廠商會代表林大輝啱啱出咗六月份立法會通訊，封面大字標題寫住：「政改方案．締造歷史」，封面配圖竟然係疑似下屆特首候選人、政務司司長唐英年（唐唐）笑晒口嘅半身相，即係當正唐唐係政改大功臣啦。而煲呔曾呢？對唔住，半格位都冇，擺明剃佢眼眉！
係人都知道大輝係唐唐「家臣」，今次不避嫌力撐唐唐咁招搖，都不過係想幫佢爭功。不過講真句，政改向前行咗一步，隨之而來係本地立法嘅利益爭奪戰，區議會委任制未傾掂，加上政局大洗牌，明年區議會選舉肯定又係一場混戰，一籃子問題仲未解決，係咪有人可以喺政改上領功，至今仍係未知之數。
即使論功行賞，喺政改斡旋過程中，特區政府到底做咗幾多嘢、係咪話到事，大家心中有數，畫公仔唔使畫出腸，幾時輪到煲呔曾同唐唐喺度爭功？