政情：沈祖堯上任忙拆彈
中文大學校長沈祖堯上任未夠十日，就有幾個炸彈等佢拆。前晚佢攜同太太為香港真光書院及中學畢業禮做主禮嘉賓，佢氣定神閒咁話，孫中山銅像擺放問題已經解決，遲啲會公布。至於被封為新一代民主女神嘅「大專2012」成員、中大三年級學生周澄自爆做過舞女，沈校長就話，校方正安排老師同佢傾偈，但佢仲補番句：「周小姐做緊嗰件事嗰陣，仲未係中大學生喎。」擺明同周澄撇清關係。
至於另一個炸彈——新民主女神像安置問題，就仲未有頭緒，沈校長話遲啲要搵學生再傾過。三個炸彈嘅威力，令到沈校長應接不暇，似乎應驗咗沈太初時唔肯畀老公接掌中大嘅憂慮。尋日兩夫婦一同現身撐真光，問沈太呢排老公有冇瞓唔着覺，佢甜絲絲笑謂：「OK喎。」沈校長都話，到目前為止都幾好呀！
今年係真光創校一百三十八周年，原來本港好多名人都係舊生，好似香港大學校長徐立之咁，就係真光小學校友，尋日校方仲貼埋徐立之當年嘅成績表畀學生睇，以資鼓勵，但就唔對外公開。不過，幾叻都好，徐校長都入唔到真光中學。點解？因為中學係女校囉！真光盛產才女，好似名作家林燕妮同前港姐冠軍謝寧，都係真光傑出校友。