政情：名人校友獻技賀華仁
香港華仁書院同九龍華仁書院分別慶祝九十周年及八十五周年校慶，尋晚喺紅館舉行「華仁Encore」演唱會，逾八千校友及學生家長出席，場面哄動。今年幫手表演嘅名人校友多咗食物及衞生局副局長梁卓偉，佢使出拿手嘅指揮絕技，指揮樂團演奏《黃河協奏曲》，揮動指揮棒時有板有眼，相當專業，博得現場熱烈掌聲！
指揮朗誦魔術唱粵曲
除咗梁卓偉外，較少表演嘅前立法局主席黃宏發，尋晚都出山朗誦英文版宋詞《滿江紅》，發叔近年埋首將唐詩譯成英文，莫非連宋詞都譯埋？至於七一年九華畢業嘅盈拓副主席袁天凡，尋晚竟然表演魔術，佢話好認真對待今次表演，事前練習咗好多次，太太就做佢服裝顧問，作為舊生都算係飲水思源。
一向力撐華仁嘅馬會主席陳祖澤（John），一如去年唱英文歌籌款，今次唱《禪院鐘聲》，難度都幾高吓，事關曲調愈唱愈快，中文已經夠難唱，英文就更加唔使講，但阿John唱咗咁耐英文粵曲，又點會難到佢吖！