政情：李漢奸講退黨又跳草裙舞

寸民主黨變民調黨

李漢奸之前講過會利用假期思考自己去向，返嚟先決定係咪退黨，誰知假期係就係放完喇，但佢竟然繼續扭扭擰擰跳草裙舞，話外遊期間掛住欣賞風景，故意唔去諗退黨問題喎。不過轉個頭，尋日佢又上電台繼續賣黨，批評民主黨提出同接受呢個改良版區議會方案係錯誤決定，又指摘民主黨太過注重民調同選票，好似變咗「民調黨」。佢話自己做咗民主黨裏面嘅反對派多年，仲講到明好希望將來喺黨裏面仍然有影響力，想人聽佢講嘢，否則留喺個黨都冇意思喎。

李漢奸出席完電台節目後，仲繼續對住個黨發炮，話覺得民主黨依家行緊嘅路線愈來愈似建制派，同政府亦行得愈來愈近，因為佢從未見過民主黨會好似依家咁讚到政府上天，連民建聯都追唔上。講到尾，原來又係抹黑同唱衰民主黨。

咁又係，李漢奸賣黨劣迹斑斑，仲當正公民黨係親生仔。好似二○○○年立法會補選，佢就走去支持依家做咗公民黨黨魁嘅余若薇；再近啲就係二○○七年嘅另一個立法會補選，佢又走去支持「民主阿婆」陳方安生，又勁踩當時都好想參選嘅黨友甘乃威，總之手指拗出唔拗入。今年所謂嘅「五區公投」一役，佢更公然企喺公社黨嗰一邊，同民主黨對着幹，真虧佢仲話自己仍然關心民主黨嘅前途同發展！

「李漢奸」咁講法，鐵頭仁尋日忍唔住出嚟反駁。佢話睇唔到依家有邊個政黨唔睇民調做嘢，因為唔聽民調即係唔理民意。對於李漢奸話佢哋讚政府，鐵頭仁更加無名火起，話民主黨仍然不時批評政府，仲反問李漢奸到底聽到民主黨邊一句說話係讚政府添。李漢奸人見人憎，早已成為民主黨嘅負資產，有民主黨核心人士更透露，黨內對佢始終唔肯清楚去向好唔滿意，懷疑佢跳草裙舞係別有居心。核心人士仲話，大部分黨員對李漢奸嘅去留唔再強求，只希望佢早啲走人，唔好再搞衰個黨，難為李漢奸到依家仲扭扭擰擰唔肯退黨，莫非佢仲咁厚顏想繼續留喺民主黨？