中環出更：肥胡歎潮菜四川佳釀成新寵
醫管局主席胡定旭上任香港總商會主席已有一個多月，近期頻頻約會好友食飯慶祝。卓妮早前去潮州商會會員俱樂部食晚飯期間，就咁啱巧遇肥胡喺度食晚飯，更加蹺嘅係，當晚潮州商會永遠名譽會長莊學山夫婦都喺度晚膳，仲喺正隔籬房，肥胡同莊學山兩個「家己冷」一見到面即搭晒膊頭，寒暄一番。
肥胡出名嘴刁，唔「熟」唔食，卓妮意思係佢去得嘅食肆都熟晒架步，好似去到潮州商會，就柯打咗出名嘅手撕凍烏頭魚、花雕蛋白蒸肉蟹、蝦棗伴芋卷、燕窩雞茸羹、潮式鹹香雞等做主菜。甜品就點選咗玉露鴛鴦及愛心奶皇酥伴桂花糕，兩味甜品都係由半島酒店嘉麟樓工作多年嘅退休老師傅親自主理，可媲美手工藝品。
「手撕凍烏頭魚」係選用元朗新鮮靚烏頭，一條重約兩斤半至三斤，煮熟拆肉後配上秘製醬汁，回味無窮。「花雕蛋白蒸肉蟹」選用本地肉蟹，配上陳年花雕酒，香氣撲鼻，呢個菜最難係控制煮蛋白嘅火路。至於「燕窩雞茸羹」，原來以前係用魚翅煮嘅，但配合環保改用燕窩，清淡、有益又養顏。
「舍得」酒體香醇細膩
肥胡每次開餐經常有葡萄酒或花雕酒相伴，但最近佢又有新寵，就係產自內地四川射洪縣嘅高檔品牌「舍得」白酒。肥胡話，有次一位內地部長級官員帶咗支「舍得」酒來港同佢一齊品嘗，肥胡試後大讚酒體香醇而細膩，飲落好舒服，一試難忘。由於「舍得」酒喺香港無得賣，所以呢位部長第二次來港就帶咗六支送畀肥胡慢慢品嘗。
「舍得」呢個品牌帶有哲學理念，帶出人生要領悟「舍」與「得」呢種大智慧，酒名有別於茅台、五粮液或劍南春呢類以地域或釀酒原料為名嘅品牌名稱，加上「舍得」酒採用生態釀酒工藝技術及嚴格監控陳釀年限，令酒體醇厚細膩，口味協調，回味無窮，所以迅速喺內地打響名堂，不少內地官員都追捧。
卓妮