公屋塌石屎房署漠視危機
陳先生一家四口居於青衣長青邨青榕樓，近兩年來一直受客廳及睡房天花剝落問題困擾，「跌落嚟嗰笪有成三米乘兩米咁大，同房署投訴咗成兩年都解決唔到，依家連鋼筋都露晒出嚟，我驚屋企啲細路遲早有一日畀跌落嚟石屎砸親！」陳對房署漠視住戶安全深表不滿。
「除非個問題去到好嚴重，如果唔係房署好少主動做嘢！」葵青區議員徐曉杰認為，長青邨樓齡已逾三十年，設施漸見老化，房署應即時上門跟進及相約維修，「石屎剝落分分鐘死得人，唔可以拖！」徐亦建議住戶每次與房署溝通，要記錄日期及時間，以便日後與職員對質。
房署發言人澄清，接獲住戶投訴後，已即時派員前往單位檢查，並將有危險石屎清除，及於客廳內天花位置加裝石屎防禦設施。其後亦曾多次聯絡陳先生，惜未能取得聯絡。職員最後於六月初與陳會面，確定於七月進行維修工程。