港大民意調查顯示，多達五成四港人最關注民生問題，較上年年底上調十二個百分點，創○七年六月以來新高。鬼咩！煲呔曾及一班高官日日「起錨」，政制未向前走，民生卻已拋錨！
食衞局不久前公布的《骨灰龕政策檢討公眾諮詢文件》，大家就可以見到呢個政府幾咁混吉，幾咁唔負責任！骨灰龕一位難求，皆因政府過去十年，完全沒有好好注視人口老化的問題，老人院建設及監管不足，老人家排到死仍未有宿位；骨灰龕更是離譜，據諮詢文件透露，政府可供編配的骨灰位，每年只有三百多個。好喇！二○○九年，火葬人數三萬六千五百，如果靠政府提供那三百多個骨灰龕，你話另外的三萬六千幾骨灰如何是好？
今日私營無牌非法骨灰龕亂晒龍，長生店兼營骨灰龕有之，一些民居舊樓非法經營骨灰龕有之，衍生許多如火災、污染空氣等問題。周一鑊無視問題的嚴重性，一味拖得就拖，完全不積極找地方去興建。
靠拖唔係辦法，周一鑊最叻言而無信，中央屠宰跣了交番牌照的雞販一鑊，如今又拋出個諮詢文件，將個燙手山芋畀番市民，完全睇唔到有何方法增加供應，一味耍官腔，東拉西扯沒有交代如何改例，乜嘢條件才發新牌。
周一鑊又廢噏公營骨灰龕要收年費，若然唔交，可能收番個位。真係做官幾狼死都有，你收番個骨灰龕，請問骨灰如何處置？當失物待領？老朽只能學孔子說一句：汝安則為之！如果周一鑊對人哋嘅先人咁夠薑，則其良心、良知可謂異於常人，來年又可授大勳章也。