政情：陳嘉信代邱騰華受靶

早排有個小巴司機疑停車熄匙「熱死」後，立法停車熄匙呢條草案即時hot埋，業界怨聲載道。環境局即時「救火」，提出酷熱天氣警告可豁免，尋日喺立法會法案委員會會議上，政府更一讓再讓，連暴雨警告都列入豁免之列。不過，唔知係咪環境局局長邱騰華早兩日同業界開會畀人「鬧得甘」，尋日淨係派咗環保署副署長陳嘉信去受靶，累到佢畀議員鬧政府「唔死人唔做嘢」、好「涼薄」，工聯會葉偉明仲質問佢老細去咗邊！難為陳副署長乜聲都出唔到。