政情：羅開揚事先張揚加價
唔少飲食集團嘅最低工資連廿元都未夠，成為勞方代表口中嘅無良僱主。不過一向低調嘅大快活集團主席羅開揚（Dennis），對呢個敏感議題卻毫不迴避。佢話依家集團四千幾名員工嘅平均工資係時薪廿三點五元，如果最低工資定喺廿七元左右，集團都仲應付到。
Dennis尋日現身集團業績發布會，佢話面對食物成本同租金上升壓力，集團旗下近一百間食肆由四月起逐漸提高售價，預計全年加價百分之五至八。講到最低工資問題，社會各界有好多唔同聲音，佢話如果係廿二元，根本對佢哋冇影響，因為依家集團平均工資已係廿三點五元；如果係廿七元，約有一千多名員工受影響，但計埋今年加價因素後，都仲應付得到嘅，都算有承擔。Dennis仲話，集團稍後會將呢啲意見交畀政府。
當然，若然去到三十元以上，Dennis話經營就會有壓力，又好難同股東交代。佢仲識得講笑話，如果多啲人有人工加，消費力提高，對佢哋快餐店來講都係好事喎！