政情：陳維安做嘢有誠意
政府推行擴大問責制、增聘副局長及政治助理，話咁快又兩年，係時候做中期檢討。對呢班享高薪厚職嘅副局政助，大部分評價都唔係咁高，不過有部分人評價又唔係太差嘅，好似教育局副局長陳維安（Kenneth）咁，早前頻頻為學校驗毒計劃出嚟解畫，論誠意已經好過部分玩龜縮嘅司局長，難怪佢無懼中期檢討，仲話好鍾意現時工作，希望可以順利完成餘下兩年任期喎。
曾經做過馬會馬場事務部總監嘅Kenneth，尋日首次以官式身份回馬會「娘家」，出席一項有關賽馬培訓課程通過政府資歷架構認可嘅證書頒發典禮。佢話好開心見番啲舊同事，包括賽馬事務執行總監利達賢。問到馬會與副局長嘅工作比較，Kenneth話兩邊工作一樣咁忙，以前喺馬會一星期做兩日賽馬，由朝做到晚，現在周末、周日都有好多應酬，工作時間一樣咁長喎，但係做嘢最緊要開心，錢唔係咁重要！