政情：黑英撐環保 囝囝陪捱熱
前天文台台長「黑英」林超英尋日為自己本新書《天地變何處安心》舉行發布會，本書主要係講自然同天氣變化對人嘅影響。黑英退休轉眼有一年，呢一年佢不時去學校同公營機構演講，傳授管理心得同環保訊息。黑英唔係得把口，好似尋日上到佢辦公室，已經覺得冷氣唔大，坐坐吓連出版社負責人都問佢可唔可以開大啲冷氣，黑英即時話：「開大啲呀？容乜易畀人話我冷氣唔係廿五點五度㗎？」
呢排天氣炎熱，有小巴司機疑因停車熄匙而焗死，對於呢個敏感話題，黑英就唔肯評論，話自己唔會管人、只會管自己，仲話退休人士應該知自己企喺邊。雖然係咁，佢話自己平時好少開冷氣，天氣點熱都唔開，呢幾日都係咁，除非老婆叫到；仲話個仔由細到大坐佢車都唔開冷氣，等個仔捱吓苦喎。黑英唔係職業司機就可以咁口輕輕，叫佢一日喺車入邊捱十個八個鐘，唔知佢仲會唔會講得咁輕鬆？