政情：鼠王芬抄橋質詢凍過水
早前沙田區同政府總部門口先後發生冧樹意外，向來好識走位嘅匯賢智庫立法會議員葉劉淑儀，立即利用《議事規則》提出緊急口頭質詢，又申請到喺下周三立法會暑假休會前最後一個大會上，提出緊急休會辯論，成功搶咗呢個深受公眾關注嘅議題。
最近香港又接連發生多宗老鼠咬傷人事件，靠捉老鼠起家嘅專業會議議員梁美芬立即有樣學樣，要求喺下周三立法會就鼠患問題提出緊急質詢同休會辯論。
可惜同人唔同命，立法會主席日前回覆鼠王芬，指鼠患問題雖然涉及公眾利益，但唔似得好似冧樹咁有緊急性，唔符合提出緊急辯論嘅條件。根據同一原則，相信佢提出嗰條緊急質詢最終亦會凍過水。
「食衞局」錯寫成「衞福局」
最瘀嘅係，鼠王芬向主席申辯提出緊急質詢嘅理據時，將食物及衞生局嘅簡稱「食衞局」寫錯咗做「衞福局」，時光倒流返去幾年前政府未改組嘅時代，不過今次就唔知係佢自己定係啲助理搞錯。除咗鼠王芬之外，旅遊界議員謝偉俊尋日亦入紙申請喺下周三就強迫內地旅客購物問題提出緊急質詢，原因係十‧一長假期嚟緊喎！呢條質詢到底有幾緊急，真係見仁見智。