政情：唐唐告狀恐食檸檬
議會語言暴力日趨火爆激烈，政府忍咗兩年後終於谷爆，政務司司長唐英年早前去信立法會內務委員會主席劉健儀投訴反擊，揚言官員若再受辱就拉隊離場，為行政立法拉開一場小角力。內會將投訴轉介議事規則委員會，研究賦予權力事務委員會主席，等佢哋有權驅逐出言「辱官」議員離場。不過據聞建制派認為政治上不可行，為免捲入「黨爭」，唔會幫手追打泛民。睇怕今次唐唐告狀，結果都係食檸檬收場。
回歸十三年，行政立法關係一直未和諧過，議事堂更加係主戰場，語言暴力不斷升級，官員變成議員用嚟祭旗嘅箭靶。「唐唐」唐英年投訴多次無效後，最近終向內會發最後通牒，投訴六月底食物安全及環境衞生事務委員會開特別會議，討論民主女神像被當局沒收時，食環署署長卓永興被社民連黃毓民鬧係「狗官」，聲言如果再發生同類事件，官員可能拉隊離席抗議。
立法會聲名大不如前，如果以後官員開開吓會，因不甘受辱集體「起錨」離場，香港議會真係唔知變成乜嘢景象。大家咪以為議事規則委員會暑假復會後跟進事件，情況就有望化解，其實，議會內嘅「辱官」行為同社會上嘅樓價問題一樣咁錯綜複雜，邊有咁容易可以解決！
趕議員離場易惹非議
有建制派政黨核心話，投資可賺可蝕，涉及風險，立法會若賦權予事務委員會主席，驅逐出言「辱官」議員離場，代價一樣可大可小，涉及巨大政治風險，事關部分事務委員會規模細小，有啲政黨只有一個代表在內，如果因批評官員時言論出位，就被主席裁決要收回言論，甚至被趕離場，肯定掀起爭議。如果主席同被逐議員來自意識形態不同嘅政黨，分屬選舉競爭對手，就更加惹嚟藉機「打壓對手」嘅非議，尤其未來兩年分別有區議會選舉同立法會選舉，好易被人質疑，係咪想令對手喺議會「滅聲」先？屆時分分鐘會引起黨爭。
為免捲入政治漩渦，建制派已有默契，表明對政府愛莫能助，唔會出手箝制泛民，議事規則委員會今次開「快勞」受理政府投訴，只屬例行公事。唐唐向立法會告狀，煮泛民米，唔理佢事先有冇同建制派摸過底，最終結果九成九又係不了了之，食硬檸檬。可以預見，喺可見將來，議會內嘅語言暴力文化依舊，高官上議事堂，帶定易潔鑊擋箭啦！