中環耳目：為食張宇人立會私藏雪糕
立法會飲食界議員張宇人（Tommy）減肥成功後，學懂節制飲食，不但少食肥膩嘢，連含高卡路里嘅紅酒都少飲咗。不過，Tommy有樣嘢點都搣唔甩，就係由細食到大嘅雪糕，佢至今每日例必食一杯迷你裝嘅Haagen-Dazs，遇上周三長駐立法會開會，就會買定啲存貨放喺立法會宴會廳個雪櫃內，等食完飯歎番杯當甜品。
Tommy最鍾意嘅Haagen-Dazs味道係Summer Berries（仲夏野莓），但可惜呢種味道無散賣，要綑綁式購買四款鮮果口味嘅迷你杯禮盒裝，內含仲夏野莓味道外，仲有士多啤梨、杧果及香蕉味。Tommy食食吓雪糕諗起以前嘅減肥經歷，就係食雪糕嘅分量要減半，食到一半就要冚埋個蓋，不情願咁放番入雪櫃，尋日見佢攞雪糕出嚟舔晒脷個樣，就知佢幾鍾意食雪糕嘞！
