中環出更：阿松獻身妻女甩身
小朋友可以喺父母嘅關愛下長大最幸福，可惜今時今日搵食艱難，父母想抽多啲時間陪住屋企個心肝椗，都唔係咁易。好似梁錦松咁，唔單止留喺香港嘅時間少，連留喺屋企嘅時間都唔多。不過修身齊家始終係人生最為重要一環，好似出入醫院呢啲事，又點少得一家之主嘅阿松喺左右。
尋日中午十二點咗右，阿松同太太伏明霞、仲有佢哋個大女司渝，一齊坐七人車現身跑馬地養和醫院，着住校服嘅司渝活潑好動，跳跳紮紮咁落車，同戴住黑超嘅小伏成個餅印咁，難怪小伏每次提起個女都甜絲絲啦。難得見到佢哋一家三口咁齊人，卓妮目睹好多傳媒隨即上前想同小伏傾幾句，不過阿松即時上前主動「獻身」，問記者等咩，等老婆可以甩身，夠晒Man！
不過講到衞生就唔及囡囡啦。事關司渝一入到醫院，即時主動攞消毒啫喱捽手，又自行攞口罩戴上，非常醒目。雖然阿松無講佢哋係睇病定探病，不過見司渝咁精靈，大家都唔使擔心。
卓妮