中環出更：情郎搬竇白姐姐甘做阿四
才女白韻琹敢愛敢恨，與立法會議員謝偉俊（Paul）長達廿年嘅姊弟戀，白姐姐曾直言阿Paul根本唔愛佢，但私底下卻甘願做情郎嘅「阿四」，傳奇過愛情小說。卓妮早幾日傍晚六點幾行經銅鑼灣軒尼詩道，遇見一身卡其色軍人Look嘅白姐姐，出盡九牛二虎之力抽實個「紅白藍」袋，步伐沉重，不時轉換拎袋手勢，狀甚狼狽。
30人搬3日未完
白姐姐向來十指不沾陽春水，但家陣頂住三十幾度酷熱天氣搬到索晒氣，為乜咁辛苦呢？見佢一支箭標入銅鑼灣廣場一期，直奔十七樓寫字樓，謎底終於解開，原來係幫阿Paul「搬竇」。白姐姐見卓妮出現，起初顯得錯愕，扁晒嘴話：「我搬嘢搬到嘴唇乾，有乜好影啫！」但抖順條氣後，佢又熱情地邀請卓妮參觀阿Paul嘅新律師樓。
原來阿Paul位於中環環球大廈嘅寫字樓近日租約期滿，所以搬竇。舊寫字樓有古董擺設、法律文件及書籍，喺三十個搬運工人協助下，搬咗三日仲未完，白姐姐見部分文件唔漏得，惟有親自出馬做「阿四」，穿梭新舊寫字樓。佢話巨型「紅白藍」袋只係小兒科，更重嘅文件都拎過喎。話口未完，白姐姐面露疲態話：「呢幾日不停搬嘢，行到腳仔軟。」
阿Paul個新竇望落似曾相識，原來九七年嗰陣都租過，一租就四年，後來約滿先搬去中環；事隔九年，又租番同一個單位，世事就係咁蹺。
不過，今次搬竇就傳出阿Paul欠債破產。白姐姐唔肯評論傳聞，但阿Paul就力斥有人散播謠言惡意中傷，佢話：「我全部物業放喺度仲未賣，使乜破產？」又話搬竇係因為中環寫字樓租金愈來愈貴，搬到銅鑼灣去，面積都係二千呎左右，但係每呎可以慳番十幾二十蚊租金，又適合做街坊生意，着數好多喎。
卓妮