政情：張學明籲政府換樹種
上個月沙田圓洲角公園發生塌樹慘劇，一名市民被壓死，立法會尋日討論呢件事，議員質問政府用咗二千幾萬元開設嘅樹木辦到底做過啲乜。鄉議局副主席張學明提到，自己細細個喺鄉郊長大，對樹木都有唔錯嘅認識，政府依家種嘅樹，好似台灣相思、石栗同細葉榕等，根本就唔啱喺香港種，佢希望政府引刀成一快，將呢啲樹統統換晒佢，以免又再發生塌樹壓死人事件。
事後再問張學明，佢解釋香港其實有好多本土樹木，好似樟樹咁，如果真係要種，好應該優先考慮呢種樹。佢又提到，以前港英政府之所以種咁多台灣相思呢類樹木，原因係六、七十年代香港不時發生山火，燒咗好多樹，為咗盡快令各山頭變番綠樹成蔭，所以選咗呢啲生得較快嘅樹種。
張學明建議政府換晒呢類樹，以免再發生不幸事件，之後切實研究重植香港本土樹木，咁先係治本之法。原來張學明對樹木都好有認識喎，好心政府從善如流，聽吓人嘅意見喇。