負責監察同研究維港兩岸海濱規劃嘅立法會發展事務委員會小組，決定喺九月底進行為期九日嘅美加職務訪問，分別考察溫哥華、紐約、波士頓及巴爾的摩嘅海濱規劃，並同當地嘅管理機構會面。議員搭經濟客位，暫定每人團費四萬六千元，可以喺議員每屆任期嘅五萬五千元海外職務訪問津貼中扣除。
呢個海濱訪問團可謂一波三折，原定於去年九月底起行，但遇啱好多議員要上京參加建國六十周年活動，訪問團被迫押後。後來小組諗住改喺去年十二月聖誕節或今年農曆新年期間外訪，但又遇上美加冬天海濱結冰，令訪問團一拖再拖，直到本月初參考咗政府嘅同類型研究後，小組才決定於九月底起行。
話時話，政府已經用咗好多人力物力研究海外地方嘅海濱管理同營運模式，照計有好大參考作用，如今議員再山長水遠到美加實地視察，究竟作用有幾大呢？唔知會否又有議員在訪問後「順個便」同家人去遊埠呢？