政情：KK碌落樓梯變鐵拐李
勞工界立法會議員李鳳英舊年年初喺立法會失足碌落樓梯，搞到盆骨移位，前日又有議員發生樓梯意外，民協馮檢基（ＫＫ）喺屋企沿樓梯上騎樓，點知樓梯有水漬，右腳一跣，碌咗兩級樓梯，不過已經夠佢好受，扭親左腳膝頭哥，痛到飛起，尋日要做鐵拐李，撐住拐杖，一拐一拐返立法會開會，成為焦點。
ＫＫ話，已經第二次喺同一條樓梯中招，兩年前跌傷膊頭，傷患到依家都痛，今次就左腳拗柴，前日跌傷時仲未知痛，深宵仲可觀賞世界盃荷蘭對烏拉圭大戰，但尋朝瞓醒即劇痛難當，唔敢耽誤，即刻去照X光，等開完立法會大會，會去睇埋跌打，我哋祝佢早日康復！
不過，ＫＫ唔擔心整傷膝頭，反而憂心傷咗囝囝個心，事關佢應承咗讀中三嘅囝囝八月一齊去九寨溝，依家未必能夠成行，囝囝知道後可能會好失望。不過當前急務，可能係要睇睇條樓梯嘅結構有乜問題，以免發生第三次意外。